Udalak eta Aldundiak Kataideko zentroa bisitatu dute bertako langileekin eta arduradunekin batuz. Sareako langileek garraio publikoa erabili ahal dezaten, zentroak eta Aldundiak elkarlanean dihardute 2024tik.
Bisitan Maider Morras Arrasateko alkatea eta Azahara Domínguez Mugikortasuneko, Turismoko eta Lurralde Antolaketako diputatua izan dira, besteak beste.
Aldundiak azpimarratu du bere eta Sarearen arteko elkarlana “diputatuak Arrasateko zentrora egindako bisita baten ondorioz sortu zela”.
Diputatuak azaldu duenez, “Sarea Fundazioak ondoren laguntzen dituen pertsonei banatzen dizkien MUGI txartel anonimoak erosi eta kargatzeko gastua finantzatu dezakegu”.
Aldundiak aditzera eman duenez, bisitaren harira “fundazioko arduradunekin eta programaren onuradun diren zenbait lagunekin biltzeko aukera izan du”.
Bisitaren helburuetako bat izan da “haiekin iritziak trukatzea garraio publikoaren erabilerak eguneroko bizitza nola erraztu dien ezagutzeko”.
Dominguez Urtizbereak adierazi du garraio publikoa erabiltzea “askatasunez mugitu ahal izatea leku batetik bestera joatea baino askoz gehiago” dela:
“Garraio publikoak enplegurako, prestakuntzarako, osasun-arretarako eta gizarte-bizitzan parte hartzeko ateak irekitzen ditu”.
Azpimarratu du Sarea Fundazioak “funtsezko lana egiten dutela gizarte-babeseko sistemaren bazterretan dauden pertsonek aukerak berreskura ditzaten eta autonomia handiagoko bizitza baterantz aurrera egin dezaten”.
Bestalde, Agustin Tranche Aguirre Sarea Fundazioko zuzendariak “eskerrik beroena” eman dio Aldundiari “garraio-txartelak emanez gizarte-egoera ahulean dauden pertsonen mugikortasuna errazten laguntzen dutelako”.
Lankidetzari esker, “pertsona askok gainditu ditzakete gizarteratzeko eta laneratzeko prozesua zailtzen duten oztopo ekonomikoak”.
